SKRIV ! Emglev ar Skrivagnerien Vrezhonek

 Blog : https://skrivagnerienbzg.blogspot.com/

 

DANEVELL OBEREREZH 2024-2025

War-lerc’h eskemmoù dre ar genrouedad (40 den) hag un emvod kentañ e miz Meurzh 2024, e voe krouet  SKRIV ! Emglev ar Skrivagnerien Vrezhonek e miz Mezheven 2024, e Karaez, evel kevredigezh hervez lezenn 1añ a viz Gouere 1901, evit bezañ ul lec’h eskemm etre skrivagnerien ha skrivagnerezed a fell dezho diorren ar c’hrouiñ e brezhoneg, evit reiñ skoazell dezho en o oberoù ha da zifenn o lazioù, hag ivez evit gas war-raok anaoudegezh al lennegezh e brezhoneg hag al lenn hag ar skrivañ lennegel evit an dud.

Meur a abeg a zo bet da grouidigezh ar gevredigezh :

• Ar c’hoant hag an ezhomm da gejañ. Pouezus eo en em anaout gwelloc’h ha sevel raktresoù boutin. Ober traoù a-gevret a zo an daore gwellañ da dreuzkas ar skiant-prenañ d’ar remziadoù yaouank.

• An ezhomm da vezañ stummet : war ar yezh end-eeun, met dreist-holl war ar sevel danevelloù pe romantoù, war al lennegezh vrezhonek klasel, war an doare da zegas perzhioù mat ar yezh komzet . Ezhomm a zo da  lakaat en o sav dalc’hoù stummañ arbennik hag atalieroù skrivañ.

• An ezhomm da vezañ anavezet hag anzavet. Ret eo gwellaat  an darempredoù gant an diavaez : gant an embannerien, gant an aozadurioù foran (Rannvro, h.a.), ar skolioù, ar saloñsoù, al lennadennoù… ledan eo an dachenn. Ezhomm a vo eus sikour an holl, peurgetket ar re yaouank.  Unan eus ar c’hudennoù a vo da ziskoulmañ eo  ar skoazell da reiñ d’ar c’hrouiñ lennegel (penaos/petra/piv arc’hantaouiñ) evit broudañ ar skrivagnerien hag ar skrivagnerezed da sevel oberennoù a dalvoudegezh.

Bez ‘ ez eus 25 den o deus emezellet betek-henn.

Emvodoù ha raktresoù bet e 2024 ha 2025

Miz Gwengolo 2024

Emvod dre vizio e-lec’h ma’ z eo bet divizet kemer perzh en darvoud Kant vloaz Gwalarn dre sevel un antologiezh divyezhek danevelloù savet gant skrivagnerien Gwalarn. Anv a zo bet ivez da aozañ un dalc’h stummañ hag a badfe un devezh.

Miz Meurzh 2025

Emvod e ti SKED  e Brest da-geñver digoridigezh diskouezadeg Kant vloaz Gwalarn. Ur breud a zo bet evit gouzout ha mat e oa treiñ oberoù brezhonek e galleg. An darn vrasañ eus an izili a soñj dezho ez eo un dra talvoudus. Aet eo war-raok an antologiezh a-benn neuze (15 danevell dibabet ; 9 troer). Kaset e oa bet al lodenn c’hallek d’an embanner dibabet. Ne chome mui nemet al lodenn vrezhonek da frammañ, ul labour bet graet neuze gant an embanner dreist-holl. Divizet e oa bet ivez sevel ur raklavar, ur rakskrid hag ur golo.

Ul labour frouezhus a zo bet graet gant an droerien. Reoù ne oant ket boas ouzh an treiñ, met bennozh d’an eskemmoù etre an dud eo bet gwellaet an traoù ha kemeret plijadur zoken. Talvoudus e vo ar skiant-prenet-se evit an amzer da zont mar bez oberoù all da dreiñ.

A-du’rall e stader hon eus poan o tesachañ merc’hed ha tud yaouank davedomp ha re gozh eo oad keitat izili SKRIV!

Miz Eost 2025

Emvod ar c’huzul-merañ dre vizio

Moullet eo bet an antologiezh divyezhek Gwalarn 100 vloaz/100ans, Danevelloù/Nouvelles, gant Al Liamm. Tennet ez eus bet 400 skouerenn. Krog eo ar brudañ : Gouel broadel ar Brezhoneg e miz Gouere, abadennoù radio gant Arvorig.fm. Reoù all a zo da zont : e Roazhon en egor Ouest-France d’an 22 a viz Du 2025, e Skol an Emsav d’an 23 a viz Du 2025, un abadenn gant ti Dialogues e Brest e 2026 (deiziad da dermenañ).

Kemer a raio perzh ivez SKRIV ! e Foar al levrioù aozet gant La Baie des Livres Montroulez d’an 21/22/23 a viz Du 2025. Kinniget e vo ur raktres lennegezh evit ar yaouankiz gant BDL, SKRIV !, KLT, e stumm un daol-grenn e brezhoneg (jubennet e galleg). Evit se eo bet aozet ur c’houlennaoueg er skolioù divyezhek evit anaout gwelloc’h ezhommoù ha c’hoantoù ar re yaouank e-keñver al levrioù.

Klozadur

Kaset ez eus bet ur raktres a zoare gant SKRIV ! a-zivout Kant vloaz Gwalarn. Emeur  o sevel unan all e dibenn 2025 diwar-benn al lennegezh evit ar yaouankiz. Dav eo anzav evelkent n’eo ket bet savet an holl raktresoù a oa bet anv anezho er penn kentañ evel ar stummadur diabarzh war al lennegezh. Ar blog  n’eo ket deuet c’hoazh da vezañ ur benveg gwall implijet hag anavezet gant an holl. N’eus  ket bet gallet sachañ reoù yaouank da gemet perzh en hon obererezh. Hemañ a vez renet gant daou zen hepken peurliesañ. Mar fell dimp gwelout SKRIV ! o c’hoari ar roll lakaet er statudoù ha seveniñ ar palioù meneget enno eo poent ma c’hellfe ur skipailh ledanoc’h magañ buhez hor c’hevredigezh.

Fulup Lannuzel