Rentañ-kont emvod dre vizio kuzul-merañ SKRIV !

d’ar Sadorn 2 a viz Eost 2025 da 14 eur 00

Izili bezant : Fulup Lannuzel, Malo Bouëssel du Bourg, Kristian Braz, Bernez Rouz, Paol ar Meur

Izili digarezet : Laurence Lavrand, Jakez-Erwan Mouton

Pemp kraf a oa war ar roll :

1. Raktres antologiezh divyezhek danevelloù Gwalarn - stad an traoù
2. Kinnig raktres  « Lennegezh evit ar yaouankiz »
3. Raktres SKRIV ! evit Redadeg 2026
4. Deiziadiñ an emvod-meur
5. Adlañsañ ar blog

Kavet e vo amañ un diverrañ eus ar breud gant an divizoù bet kemeret.

1.      Raktres antologiezh divyezhek danevelloù Gwalarn - stad an traoù

Moullet eo bet al levr. Tennet ez eus bet 400 skouerenn anezhañ. Prest e oa evit Gouel Broadel ar Brezhoneg ha KEAV. Roet e oa 40 skouerenn da Fulup Lannuzel e GBB. Ingalet ez eus bet  2 skouerenn da bep troer ; chom a ra neuze 22 skouerenn gant SKRIV!. An dalc’h eo bremañ gouzout penaos e vo tu da vrudañ al levr.

Ret e vo goulenn digant Jerom Olivry ha kaset ez eus bet skouerennoù d’ar gazetennerien. Hervez Bernez Rouz e vo diaes brudañ al levr er-maez eus ar metoù brezhonek. Marteze en Télégramme, Armen, Bretons, Le Peuple Breton. Soñjal a ra Kristian Braz ez eo d’an embanner da blediñ gant ar bruderezh-se, ha da SKRIV! da sikour evel-just. Fulup Lannuzel a lavar en deus savet ur pennad evit an niverenn da zont eus Bremañ, ha graet ur pennad-kaoz gant Manu Mehu en RBI er sizhun tremen.

Kristian Braz a ginnig e ve klasket gwerzhañ ar skouerennoù a chom ganeomp. Bernez Rouz a lavar e ve mat tennet gounid eus an diskouezadeg Kant Vloaz Gwalarn hag a zo o treiñ dre Vreizh a-bezh evit se. E c’hellfed gwerzhañ skouerennoù e-ser ar prezegennoù a vez graet neuze. E Kemper, d’an 13 a viz Gwengolo e vo unan,  unan all e miz Du e Bro-Dreger hag ivez e Karaez, e saloñs al levrioù.

A-hend-all e vo un abadenn war Gwalarn e saloñs al levrioù e Karaez gant Erwan Hupel, met ret e vo kaout tud all, un den eus SKRIV! en o zouez, evel ma’z eus bet e GBB. Un doare e vo da reiñ brud d’ hor c’hevredigezh ivez.

Petra ober gant ar skouerennoù a zo gant FL avat ? Koustus-bras e vefe o c’has dre ar post. Fulup Lannuzel a ginnig un doare « trok ». Goulenn digant Al Liamm (Tudual Huon a zo o chom e Kemper) pourchas 22 skouerenn da v-Bernez Rouz, ha Fulup Lannuzel a restaolfe ar skouerennoù a zo gantañ da Al Liamm da vare saloñs Karaez.

Goulenn a ra Fulup Lannuzel ha raktresoù all a ve en-dro da g- Kant Vloaz Gwalarn :

 Kristian Braz a raio ur pennad-koaz en Arvorig-fm diwar-benn an antologiezh e-kerzh an hañv. Menegiñ a ra Bernez Rouz e vo embannet gant An Alarc’h niverenn diembann Gwalarn (n. 166) aozet gant Roparz Hemon  e 1944. Bez’ e vo ivez adembannidigezh Geotenn ar Werc’hez gant Jakez Riou en ur stumm divyezhek, brezhoneg/iwerzhoneg, gant Al Liamm. Bez ‘ ez eus ivez oberoù klok Jakez Kerrien, met ne vo ket prest evit saloñs Karaez avat. Erfin e vo gouestlet da w-Gwalarn niverenn an hañv ar gelaouenn Al Liamm.

2. Kinnig raktres  « Lennegezh evit ar yaouankiz »

Kristian Braz a zispleg an darempredoù en deus skoulmet gant La Baie des Livres Montroulez hag a aozo ur foar al levrioù evit ar re yaouank  d’an 21/22/23 a viz Du 2025. Un daol-grenn e brezhoneg a vo gant SKRIV !/KLT/BDL da-geñver ar foar-se. Jubennet e vo e galleg gant Sten Charbonneau. Graet e vo ur c’houlennaoueg evit gouzout pere eo ar c‘hoantoù hag an ezhommoù e-touez ar re yaouank hag ar vistri-skol (a-benn kreiz miz Gwengolo). Ur skolaer hag ur c’henner skolaj a zo o kenlabourat gant Kristian Braz, hag ivez Gwenola Coïc (Strollad HEKLEV ; gwelout al lec’hienn gaer aozet ganto). Mar gra berzh an abadenn, e soñjer lañsañ ur genskrivadeg skridoù evit ar re yaouank ha prizioù da vont ganti.

Fulup Lannuzel a ra anv eus ar c’hudennadur en deus savet war ar perag hag ar penaos eus seurt lennegezh. Pouezañ a ra war ar rummadoù oad diseurt a zo : bugale vihan, kennarded, kennarded vras, disheñvel an ezhommoù ganto. Anat eo da skouer ne vez krouet hogozik netra evit ar re etre 3 ha 7 vloaz e brezhoneg ; n’eus nemet troidigezhioù. Paol ar Meur a lavar en deus savet skridoù evit ar re yaouank, met barnet  int bet evel skridoù evit an dud deuet kentoc’h.

Kristian Braz a resisa ez eo arabat kaout re a dud war al leurenn. Un animatour (KB), ur skrivagner pe zaou, un embanner, un treser a ve dereat.

An holl a gav mat-tre ar mennozh-se. Hervez Bernez Rouz avat eo ret diwall rak re a genstrivadegoù ha prizioù a vez, kement-se o tisteraat ster ar prizioù a-benn ar fin.

Kristian Braz a resisa n’eo ket skridoù savet gant ar re yaouank ez eus anv anezho, met eus skrivagnerien a skriv evit ar re yaouank. Dibabet e ve daou pe dri anezho e pep rummad oad hag e ve klasket mont pelloc’h ha stummañ anezho a-hed ar bloaz. Sevel a raio un tamm skrid evit displegañ ar raktres, hag a vo kaset da izili ar c’huzul-merañ dindan dek devezh.

3. Raktres SKRIV ! evit Redadeg 2026

Fulup Lannuzel a c’houlenn ha bez ‘ ez eo ar raktres-se a ve kinniget evit bezañ arc’hantaouet gant Ar Redadeg 2026 ?

Respont a ra kristian Braz ez eo se a zo e kont. Malo Bouëssel du Bourg  a soñj dezhañ ez eo mat-kaer ar raktres-se hag e c’hellfe bezañ degeremeret gant Ar Redadeg gant ma vo termenet resis an hentenn, an ezhommoù pleustrek, an dasparzh anezho, al lec’h ma vo ar stummadur (…). Fulup Lannuzel  a veneg tem ar redadeg : Bevañ, bodañ, bezañ, triskell gerioù redadeg 2026. Ne zlefe ket bezañ diaes klenkañ ar raktres ennañ. An termen lakaet evit kas ar raktresoù a zo an 30 a viz Gwengolo ; chom a ra neuze daou viz da sevel hon hini.

Kristian Braz a soñj dezhañ ez eo a bouez liammañ ar raktres ouzh ar genskrivadeg hag ar stummañ a vo graet a-hed ar bloaz. Evit al lec’h e vo gwelet gant BDL pe KLT.

Mat e ve da izili SKRIV! en em soñjal a-raok sevel ar goulenn d’ar Redadeg : piv vefe prest da gregiñ e-barzh/da zegas e/he varregezh ?

 

4. Deiziadiñ an emvod-meur

A-du emañ an holl evit ma ve graet an emvod-meur e Karaez da-geñver saloñs al levrioù e fin miz Here. Bernez a yelo e darempred gant aozerien ar festival evit resisaat an deiz hag an eur (a priori e ve d’ar Sul vintin 26 a viz Here). Kerkent ha ma vo gouezet e vo kaset keloù da izili SKRIV !.

 

5. Adlañsañ ar blog

Santet e vez an ezhomm da nevesaat ar blog. Hervez Kristian Braz  e ve ur mab da Fanny Chauffin barrek diouzh se. Ouzhpenn-se ez eo Fanny ezelez eus hor c’hevredigezh ha kemer a raio perzh en abadenn  Montroulez. Dav e vo mont e darempred ganto evit luskañ an nevesaat-se.

Un dra a-bouez eo kaout ur media eskemm ha kelaouiñ a-zoare. Goulenn a reer ivez digant pep ezel eus SKRIV! klask hag anavezout a rafe un den gouest war an dachenn-se.

 

Rentañ-kont savet gant Fulup Lannuzel

Sekretour SKRIV! d’ar 4 a viz Eost 2025

 

 

 

Kemer a reomp  tro eus abadenn Digoradur bloavezh Gwalarn* a vo graet e ti SKED, 201, straed Jean-Jaurès, Brest,  evit kouviañ ac’hanoc’h da gemer perzh e :                                                         

Emvod SKRIV ! Emglev ar Skrivagnerien Vrezhonek

d’ar Sadorn 1^añ a viz Meurzh 2025 e ti SKED Brest  da 10 eur 15

Daoù graf a vo gwelet e-pad an emvod-se. Da gentañ e vo klasket tennañ kentel eus al labour renet evit sevel antologiezh divyezhek danevelloù Gwalarn , ul labour renet asambles abaoe ouzhpenn tri miz a-benn bremañ.  Digor eo d’an izili**, peurgetket d’an holl droerien o deus roet o amzer hag o gouiziegezh d’ar mell labour-se. Talvezout a ra ar boan eskemm kenetrezomp evit nad afe ket ar striv-se da goll hag evit ma c’hellfe chom bev  ha ledet ar skiant-prenet-se.

Da c’houde e  klaskimp divrazañ raktresoù SKRIV ! evit 2025 (dalc’hioù stummañ en o zouez). Merzet hon eus ez eo dibaot ar merc’hed hag ar re yaouank en hon touez. Dav e ve kas an traoù war-raok evit tizhout ur c’hempouez gwelloc’h. Ha poent eo sevel ur programm evit reiñ korf d’ar raktresoù diniver a oa bet graet anv anezho en hon emvodoù kent.

An amzeriadur a roomp amañ dindan a zo kement ha reiñ da c’houzout. Ar pal eo kaout divizoù founnus etrezomp

10 eur 15          Degemer an dud

10 eur 30         1. Eskemm etre an droerien (60’)

Goulennet e vo digant an droerien lavarout, e berr gomzoù, penaos o deus         kaset da benn al  labour treiñ : diaesterioù, diskoulmoù, mont-dont gant ar reizherien, skiant-prenet… Lusket  e vo ar gaoz gant K. Braz hag a raio anv ivez eus teir zroidigezh disheñvel eus ar memes pennad (berr) gant Stevenson (e galleg) a-raok treiñ anezhañ asambles e brezhoneg.

11 eur 30       3. Eskemm diwar-benn program ar bloavezh 2025 (60 ‘)

Ezhomm a zo da resisaat linennoù-stur SKRIV ! evit 2025, peseurt obererezh a     fell dimp kas da benn, evel an dalc’hioù  stummañ a zo bet meneget c‘hoazh, hag a chom da resisaat ken e-keñvet stumm ken e-keñver danvez. Lusket e vo ar gaoz gant F. Lannuzel

12 eur 30          Kinnig a reomp d’ar re o devo c’hoant ur predig yen war al lec’h (paeet                              gant SKRIV !)

 

*Digoret e vo diskouezadeg Gwalarn da ziv eur goude merenn, al lid digeriñ da deir eur, ha goude un daol grenn gant Erwan Hupel, Tristan  Loarer, Pierrette Kermoal, Tudual Huon.

** Ha d’ar re a zo prest da emezelañ da-geñver an emvod.

 Follenn vrudañ  SKRIV! /doare da emezelañ

SKRIV !

Emglev ar Skrivagnerien Vrezhonek

 Blog : https://skrivagnerienbzg.blogspot.com/

 

SKRIV ! gant pik estlamm, mar plij ! rak c'hoant hon eus e vefe c'hoazh tu da gontañ ar bed dre ar brezhoneg. Ar pezh a dalv skrivañ muioc'h, ha gwelloc'h dreist-holl, evit ma vefe desachet al lennerien. Setu perak hon eus roet ar brall da Emglev ar Skrivagnerien Vrezhonek, ur gevredigezh hervez lezenn ar 1^añ a viz Gouere 1901.

 

Pal ar gevredigezh-mañ eo bezañ ul lec’h eskemm etre skrivagnerien ha skrivagnerezed - a vremañ pe da zont - a fell dezho diorren ar c’hrouiñ e brezhoneg, ha reiñ skoazell dezho en o oberoù ha da zifenn o lazioù, hag ivez da gas war-raok anaoudegezh al lennegezh e brezhoneg hag al lenn hag ar skrivañ lennegel evit an dud.

 

Diazezet eo sez ar gevredigezh e Ti ar Vro,  6 plasenn Gwirioù Mab-den, 29270 Karaez.

 Meur a abeg a zo bet d’ar raktres a fell dimp kas da benn :

• Ar c’hoant hag an ezhomm da gejañ kenetrezomp. Pouezus eo en em anaout gwelloc’h ha sevel raktresoù boutin kenetrezomp. Ober traoù a-gevret a zo an daore gwellañ da dreuzkas ar skiant-prenañ d’ar remziadoù yaouank.

• An ezhomm da vezañ stummet : ar stummadur a vo unan eus hon obererezhioù diazez.  War ar yezh end-eeun, met dreist-holl war ar sevel danevelloù pe romantoù, war al lennegezh vrezhonek klasel, war an doare da zegas perzhioù mat ar yezh komzet . Mennet omp  da lakaat en o sav dalc’hoù stummañ arbennik hag atalieroù skrivañ.

• An ezhomm da vezañ anavezet hag anzavet. Ret eo gwellaat  an darempredoù gant an diavaez : gant an embannerien, gant an aozadurioù foran (Rannvro, h.a.), ar skolioù, ar saloñsoù, al lennadennoù… ledan eo an dachenn. Ezhomm hor bo eus sikour an holl, peurgetket ar re yaouank.  Unan eus ar c’hudennoù a vo da ziskoulmañ eo  ar skoazell da reiñ d’ar c’hrouiñ lennegel (penaos/petra/piv arc’hantaouiñ) evit broudañ ar skrivagnerien hag ar skrivagnerezed da sevel oberennoù a dalvoudegezh.

 

Evit emezelañ kit war HelloAsso : https://www.helloasso.com/associations/skriv-emglev-ar-skrivagnerien-vrezhonek/adhesions/skriv-emezellin

Pe leuniañ ar follenn amañ dindan :

FOLLENN EMEZELAÑ

SKRIV ! Emglev ar skrivagnerien vrezhonek

Sez : Ti ar Vro, 6 plasenn Gwirioù an Den, 29270 Karaez

Kevredigezh hervez lezenn ar c’hentañ a viz Gouere 1901

Da leuniañ gant an ezel :

Anv-bihan :………………………………………Anv :………………………………………………..

Chomlec’h :……………………………………………………………………………………………….

Kod post :………………………………….Kêr :……………………………………………………….

Pellgomz :………………………………… Chomlec’h postel :…………………………………     

Disklêriañ  a ran e fell din  dont da vezañ  ezel(ez) eus ar gevredigezh SKRIV !

Paeañ a ran va skodenn evit ar bloavezh o ren, bezet ur sav 10 € gant ur chekenn war anv    SKRIV ! Emglev ar skrivagnerien vrezhonek  da gas dre ar post da sez ar gevredigezh :

Ti ar Vro, 6 plasenn Gwirioù an Den, 29270 Karaez

 

Graet d’an (deiziad) e (lec’h) :                    

Sinadur an ezel(ez) :

 

 Antologiezh divyezhek danevelloù Gwalarn : stad an traoù

Lusket e oa bet al labour ouzhpenn tri miz 'zo.  Troet ez eus bet e galleg pemzek danevell eus mare Gwalarn. Darev eo al labour ha kaset e vo a-barzh nemeur d'an embanner Al Liamm. Un avantur eo he deus roet tro da eskemmoù frouezhus etrezomp. Ra vo trugarekaet an droerien evit an amzer gouestlet ganto (treiñ  ha  reizhañ). Un degasadenn a zoare e vo da berzh-mat Bloavezh Gwalarn 2025.

Urzh	Skrivagner	Danevell	Titl e galleg	Troer
1	Abeozen	Ur c’higer	Un boucher	K. Braz
2	Abeozen	Reder foarioù	Coureur de foires	M. Madeg
3	Drezen Y.	Ar c’hloc’h aour	La cloche d’or	J. Abherve-Gwegen
4	Drezen Y.	Mintin glas	Matinée bucolique	J. Abherve-Gwegen
5	Gow Y. ar	Al laer dienn	Le voleur de crême	L.Lavrand
6	Hemon R.	Mari Stuart	Mari Stuart	K. Braz
7	Hemon R.	An toueller	Le séducteur	F. Lannuzel
8	Kongar D.K./ Kervella F.	Drailhennoù diwezhañ ar pardon	Les dernières bribes du pardon	F. Lannuzel
9	Konan J.	Lannevern e kañv	Lannevern en deuil	E.Hupel
10	Meavenn	Merc’hed Brest	Les femmes de Brest	F. Lannuzel
11	Meavenn	Ar c’hentañ toull	La première cassure	J.E. Mouton
12	Meavenn	An den a ouie ar brezhoneg	L’homme qui savait le breton	J.E. Mouton
13	Riou J.	Termaji war ar blasenn	Des saltimbanques sur la place	B. Rouz
14	Riou J.	Ur barr-avel	Un coup de vent	F. Lannuzel
15	Roc’halan/ An Diuzet A.	Ar fals lizher	La fausse lettre	J. Penneg

Fulup Lannuzel

Sekretour

 

Rentañ-kont emvod SKRIV ! Emglev ar Skrivagnerien Vrezhonek e Karaez da-geñver Saloñs al levrioù d’ar 27 a viz Here 2024

 

Bezant : Fulup Lannuzel, Laurence Lavrand, Kristian Bras, Paol ar Meur, Jakez-Erwan Mouton, Bernez Rouz, Jil Penneg, Jorj Abherve-Gwegen, Loeiza An Duigou.

Peder c’hraf a oa war ar roll :

• 1.      Niver an izili
• 2.      Raktres antologiezh divyezhek danevelloù Gwalarn
• 3.      Raktres danevelloù doare Gwalarn
• 4.      Aozañ un dalc’h stummañ

Kavet e vo amañ un diverrañ eus ar breud gant an divizoù bet kemeret.

 

1- Niver an izili

Bez’ ez eus bremañ 22 ezel, bezet : Fulup Lannuzel, Kristian Braz, Jakez-Erwan Mouton, Paol Ar Meur, Bernez Rouz, Laurence Lavrand, Malo Bouessel du Bourg, Yvon Gourmelon, Filip Oillo, Yann-Ber Kemener, Herve Lossec, Mai  Ewen, Jil Penneg, Jorj Abherve-Gwegen, Iwan ar Fur, GG Gwenn, Uisant Crequer, Mikael Madeg, Paskal Hervio, Loeiza an Duigou, Patrick Drean, Iwan Couée.

2- Raktres antologiezh divyezhek danevelloù Gwalarn

Asantet en deus Al Liamm embann an antologiezh (emziviz gant Tudual Huon e-kerzh ar saloñs).

Graet e vo al labour treiñ gant SKRIV ! a-raok kas an traoù d’an embanner. Klask a raimp mont ar pellañ gwellañ en aozidigezh an testennoù. A bouez eo e ve galleg reizh an troidigezhioù. Mat e ve kaout ur difazier gallek er-maez eus SKRIV !: fiziout se pe en embanner, pe en ur c’helenner/ez gallek, pe e kevredigezh difazierien Breizh. O vezañ ma n’emañ ket a-unan an dud vezant, e tivizer gwelout se diwezhatoc’h.

Evit danevell Ur barr-avel gant Jakez Riou e kinniger ober un droidigezh nevez, disheñvel neuze diouzh an hini bet graet gant Youenn Drezen e 1947. Loeiza an Duigou a zo asant d’hec’h ober.

Bernez Rouz eo a droio Termaji war an blasenn gant Jakez Riou ha Jil Penneg Ar falz lizher gant Roc’halan.

Divizet ez eus tennañ Yun (re hir)  gant JaKez Riou ha Kalon an oan gant Youenn Drezen (ne vez ket kavet dispar gant lod) diouzh ar roll.

Daoust ma’z eus kalzik traoù a-benn bremañ, n’eo ket klok-echu ar roll, mar bez kavet « perlezennoù all ».  Gant ma vint berr e c’hellint bezañ ouzhpennet.

Loeiza, Jil ha Bernez a zo prest da genlabourat etrezo evit eskemm ha reizhañ o zroidigezhioù, memes tra gant Laurence ha Paol. Un doare e vo da gaout ur sell disheñvel war labour an-unan.

Lakaet e vo an holl destennoù brezhonek e peurunvan.

Evit an anvioù-tud pe an anvioù-lec’h e ve mat soñjal aesaat an traoù evit al lenner gallek (da skouer Yann ar C’herneis = Yann Kerneis) ; a-hend-all e c’hello bezañ implijet notennoù e traoñ ar bajenn evit displegañ resisoc’h an traoù, pe da nebeutañ lakaat ar gerioù-se e lizherennoù stouet.  Ar pal eo aesaat ar gomprenezon.

Evit ar gwirioù war skridoù ‘zo e vo gwelet gant an embanner.

Degas a reomp da soñj en deus asantet Erwan Hupel sevel ar rakskrid.

Evit ar skridoù brezhonek orin e vo da bep troer da ginnig anezhañ e skritur peurunvan. Roet e vo neuze d’an embanner hollad ar skridoù brezhonek hag hollad ar skridoù gallek war un dro.

Anv a zo eus an termen da lakaat d’al labour. Evel-just ez eo Saloñs Karaez 2025 an disoc’h. Met bez ‘ e rank an traou prest a-raok se. Bernez Rouz a veneg neuze e vo lusket an traoù da vat a-fet Diskouezadeg Gwalarn a droio e tiez ar vro, e SKED Brest d’ar 1^añ a viz Meurzh 2025. Diwar se ez eus divizet e vo mat d’an troidigezhioù bezañ graet evit dibenn ar bloaz-mañ, miz Kerzu. E fin miz C’hwevrer e vo mat dastum an holl skridoù kempenn mui-pe-vui (kas anezho da sekretour SKRIV !). E miz Mae e vo daveet ar « pakad » da Al Liamm.

Meneget ez eus kudenn an arc’hant da gaout diwar-bouez al labour-se. Dre ma vez roet diwar vremañ ur yalc’had da bep skrivagner e kinnigomp ma vo graet evit STRIV ! er gevrat a vo sinet gant Al Liamm evit embann an antologiezh.

Kinniget ez eus ivez ober testennoù enrollet e brezhoneg (mouezh hep kinkladur), un doare da kinnig un diraez nevez d’ar skridoù evit an deskerien (hag ar re all…). Da resisaat evel-just piv ha penaos e vo graet ( dre studioioù radioù lec’hel da skouer pe doareoù all..). E c’hellfe bezañ e stumm ur QR code e-barzh al levr. Da welout gant an embanner ivez.

(Sl. ar roll disoc’h evit dasparzh an troidigezhioù er pezh stag)

3. Raktres danevelloù doare Gwalarn

N’eus ket bet kinnigoù war an danvez- se estreget hini Jorj Abherve-Gwegen. A-benn ar fin e kinnig Bernez Rouz ma ve klasket lakaat se kentoc’h e dalc’h gant priz Langleiz. Roet e ve ar priz d’an danevell gwellañ war an tem-se. Mont a raio e darempred gant atebeien ar priz evit gwelout ha bez’ e c’hell ar c’hinnig-se bezañ kaset da benn. Ne vo  ket mui  ur raktres SKRIV !

 

4.  Aozañ un dalc’h stummañ

Anv a oa bet ganeomp eus aozañ dalc’hioù stummañ. Mikael Madeg, Kristian Bras, Fulup Lannuzel, ha Pierrette Kermoal o doa graet kinnigoù (sl. rentañ-kont emvod kentañ SKRIV ! e Karaez 14/03/24). Gouzout penaos ober ha pegeit e padfe, aze emañ an dalc’h avat. Fulup Lannuzel a veneg ar c’hendivizoù en deus bet er Saloñs gant Pierrette Kermoal (n’eo ket gwall entanet war a seblant) ha gant Mikael Madeg. Hemañ a ve prest d’ober un dra bennak war ar sevel romantoù e stumm ur c’hendiviz gant an dud (padelezh=1 eur hanter). Kristian Braz, diouzh e du, a rafe, emezañ e-pad an emvod, unan war ar sevel danevelloù e stumm ur « boelladenn » bleustrek (padelezh=1 eur hanter). Neuze ez eus amañ ur penn-devezh stummañ a c’heller lakaat en e sav.

Bernez Rouz a ginnig neuze koublañ se gant emvod  SKED Brest d’ar 1añ a viz Meurzh 2025, pa vo lusket Diskouezadeg Gwalarn. Diouzh ar mintin e ve prezegennoù an darvoud, d’endervezh ar stummadur a-berzh SKRIV !

Ret e vo en em soñjal pelloc’h war se, evit kaout ur program diazezet ervat. Gouzout piv a vo an « deskerien », izili SKRIV !, pe digoroc’h war an diavaez, skivagnerien hepken, pe danvez skrivagnerien… Chom a ra an traoù da resisaat c’hoazh. Kinniget ez eus ober un emvod dre vizio e deroù miz Genver.

 

Ar sekretour,

Fulup Lannuzel

 

 

 

 

Raktres antologiezh danevelloù divyezhek Gwalarn (27 10 2024)

Roll labour resisaet en emvod SKRIV! e Karaez d’an 27 a viz Here

 

Oberour	Titl	Troer	Niver ar pajennoù er skrid orin
R Hemon	Mari Stuart	K Braz	7
R Hemon	An toueller	F Lannuzel	5
Meavenn	Merc’hed Brest	F Lannuzel	3
Meavenn	Div zanevell verr tennet eus Pa c’houez avel Walarn GW. 43 1932 : Ar c’hentañ toull, An-den-a-ouie-ar-brezhoneg	JE Mouton	5 4
Abeozen	Reder foarioù	M Madeg	8
Abeozen	Ur c’higer (Dremm an Ankoù)	K Braz	4
F Kervella	Drailhoù diwezhañ ar pardon GW.60 1933	F Lannuzel	4
J Riou	Ur barr-avel	L an Duigou	4
J Riou	Termaji war ar blasenn	B Rouz	4
Y Drezen	Mintin glas GW. 12 1927 Ar c’hloc’h aour	J Abherve-Gwegen J Abherve-Gwegen	3   10
Roc’halan	Ar fals lizher	J Penneg	9
Y ar Gov	Al laer dienn	L Lavrand	14
J Konan	Lannevern e kañv	E Hupel	15
		Hollad	99